ရခိုင်နှင့် ကချင်ပြည်နယ် ရှိ ကျန်းမာရေး လုပ်ငန်းအဖွဲ့ ၏ အဓိက ရည်ရွယ်ချက်သည် ထိခိုက် ခံစားရလျက်ရှိသည့် ရပ်ရွာ လူထုများ အကြား ကာကွယ်ရေးနှင့် ကုသရေး ဆိုင်ရာ ကျန်းမာရေး ပြုစု စောင့်ရှောက်မှုများကို သာတူညီမျှ လက်လှမ်းမီ အသုံးပြုနိုင်အောင် မြှင့်တင်ခြင်းဖြင့် ရှောင်လွှဲ ကာကွယ်နိုင်သည့် ရောဂါဖြစ်ပွားမှု၊ သေဆုံးမှု နှင့် မသန်စွမ်းဖြစ်မှုများကို လျှော့ချရန် ရည်ရွယ်ခြင်းဖြစ်သည်။ ၎င်းလုပ်ငန်းအဖွဲ့မှ နယ်ပယ်(၅)ခုအပေါ် အလေးထား ဆောင်ရွက်လျက်ရှိသည်။ ၎င်းတို့မှာ (၁) ကာကွယ်ရေး၊ အခြေခံနှင့် အလယ်အလတ် ကျန်းမာရေး ပြုစု စောင့်ရှောက်မှုနှင့် ကျန်းမာရေး မြှင့်တင်မှုကို သာတူညီမျှ လက်ခံရရှိအောင် ဆောင်ရွက်ပေးခြင်း၊ (၂) ရောဂါ ပြန့်ပွားမှုကို စောင့်ကြည့် လေ့လာ၍ကူးစက် ပျံ့နှံ့မှုကို ချက်ခြင်း ကိုင်တွယ် ဆောင်ရွက်ခြင်း၊ (၃) ပုံမှန် ကာကွယ် ဆေးထိုး ပေးခြင်း၊ (၄) ကိုယ်ဝန်ဆောင် မိခင်နှင့် ကလေး ပြုစု စောင့်ရှောက်ရေး (MCH) လုပ်ငန်းများ ဆောင်ရွက်ခြင်းနှင့် (၅) ကျန်းမာရေး ဝန်ကြီးဌာနနှင့် မိတ်ဘက် အဖွဲ့အစည်းများ၏ ညှိနှိုင်း ဆောင်ရွက်မှုနှင့် ပူးပေါင်း ဆောင်ရွက်မှု ပိုမို အားကောင်းလာအောင် ပံ့ပိုး ဆောင်ရွက်ခြင်း စသည်တို့ ဖြစ်သည်။

ကျန်းမာရေး လုပ်ငန်းအဖွဲ့အတွင်း ရခိုင်ပြည်နယ်မှ ကျန်းမာရေးဆိုင်ရာ မိတ်ဘက်အဖွဲ့ပေါင်း (၁၈)ခုနှင့် ကချင်ပြည်နယ် အတွင်းမှ အဖွဲ့ပေါင်း(၁၁)တို့ဖြင့် လက်တွဲ ဆောင်ရွက်လျက်ရှိပြီး UN အဖွဲ့အစည်းများ၊ ICRC နှင့် IFRC၊ ပြည်တွင်းနှင့် နိုင်ငံတကာ NGOs များအပြင် အာဟာရနှင့် ရေနှင့်သန့်ရှင်းရေး လုပ်ငန်းအဖွဲ့များ ပါဝင်လျက်ရှိသည်။ ၎င်းအဖွဲ့ အနေဖြင့် ပြည်နယ်နှင့် နိုင်ငံတော်အဆင့် အစိုးရ အာဏာပိုင်များနှင့် အပြန်အလှန် ညှိနှိုင်းဆောင်ရွက် လျက်ရှိပြီး ရန်ကုန်၊ စစ်တွေ၊ မြစ်ကြီးနားနှင့် နေပြည်တော်တို့၌ပုံမှန် အစည်းအဝေးများ ဦးစီး ကျင်းပ၍အစိုးရ၏ ပံ့ပိုးမှု သို့မဟုတ် အတည်ပြု ခွင့်ပြုချက် လိုအပ်သည့် အရေးကိစ္စများကို ညှိနှိုင်း ဆွေးနွေး ကြပါသည်။